Fro:
„Duerch d‘Pandemie hu vill Leit d’Virdeeler vu regionale Produkter erëm schätze geléiert. Besonnesch d’Kafe vu Fleeschproduiten, Geméis an Uebst, Eeër an och Mëllech direkt um Bauerenhaff schéngt déi lescht Méint zougeholl ze hunn. Sief et um Haffbuttek, mat engem Automat, engem Eeër- oder Mëllechfrigo oder enger Mëllechtankstell, d’Kreativitéit vun eise Baueren ass ganz grouss. Meeschtens fonctionéieren dës Verkafsstellen ouni Personal, esou datt de Client d’Suen an eng Këscht geheit oder souguer per Digicash bezilt.
An deem Kader wollte mir dem Här Minister fir Landwirtschaft, Wäibau a ländlech Entwécklung folgend Froe stellen:
- Wéi vill Bauerebetriber féieren ewell en Haffbuttek oder änlech Strukturen nom Prinzip vum Self-Service (Frigo, Automat etc)?
- Wat fir Produkter ginn am heefegsten ugebueden? Verkafen dës Betriber just Produkter vum eegenen Haff oder och nach aner Produkter?
- Wéi huet sech d’Unzuel u Betriber, déi an der Direktvermaartung aktiv sinn, an de leschte Joren entwéckelt?“
Äntwert:
- Wéi vill Bauerebetriber féieren ewell en Haffbuttek oder änlech Strukturen nom Prinzip vu Self-Service (Frigo, Automat etc.)?
Den Service d’économie rurale huet am Kader vun der Strukturerhiewung 2021 d’landwirtschaftlech Betriber zu hirer Direktvermaartung um Betrib befrot. Dësen Online-Questionnaire gouf vun 1.719 Betriber beäntwert. Dëst entsprécht 92% vun de Betriber am Erhiewungskrees. Dovun hunn 323 Betriber (18,4%) uginn, Direktvermaartung op hirem Betrib ze bedreiwen. Déi folgend Verdeelung weist sech bei de Verkaafsweeër. Dëst stellt d’Unzuel u Betriber duer, déi méi Weeër gläichzäiteg konnten uginn:
Privatverkauf: 212
Hofladen: 97
sonstiger Verkaufsweg (online, Lieferung, …): 81
Verkaufsstand: 39
Markt: 16
Automat: 12
Deemno stellt de private Verkaf dee wichtegste Verkaafswee duer. Dobäi sief awer ze soen, datt dëst och d’Wënzer mat aschléisst, déi hir Produiten ouni Zwëschenhändler verkafen.
Wat d’Schluechte vun Déieren aus der eegener Produktioun, Verschneide vu Karkasse respektiv Produktioun vu Fleeschprodukter um Haff betrëfft, sinn dës Aktivitéite vum « Règlement grand-ducal du 25 novembre 2011 concernant l’abattage à la ferme des ongulés domestiques provenant de cette exploitation, la fabrication de produits à base de viande et la mise sur le marché de ces viandes et de ces produits » ofgedeckt. De Bauer däerf dës Fleesch a Fleeschprodukter just un den Endkonsument zu Lëtzebuerg verkafen.
Momentan si bei der Veterinärsverwaltung 28 landwirtschaftlech Betriber als Selbstvermarkter an dësem Beräich autoriséiert. Dovu sinn der awer 9 Stéck net méi aktiv. Op 9 vun de Betriber ginn nach Déieren um Haff selwer geschluecht, wouvun 2 Betriber Gefligel an déi aner Schwäi respekiv Kalwer schluechten.Déi aner Betriber loossen hir Déieren an engem Schluechthaus schluechten a maachen um Haff just eng Découpe vun de Karkasse respektiv produzéiere Fleeschprodukter.
Mëllechtankstelle sinn der bei der Veterinärsverwaltung 8 enregistréiert.
- Wat fir Produkter ginn am heefegsten ugebueden?
Verkafen des Betriber just Produkter vum eegenen Haff oder och nach aner Produkter?
Déi folgend Tabelle weist d’Unzuel u Betriber, déi déi eenzel Produite verkafen. Hei konnten d’Betriber méi Produite gläichzäiteg uginn:
| Primärprodukte | Rindfleisch | 99 |
| Eier | 90 | |
| Kartoffeln | 58 | |
| Gemüse | 54 | |
| Obst | 41 | |
| Geflügelfleisch | 37 | |
| sonstiges Fleisch | 33 | |
| Kuhmilch | 27 | |
| Honig | 19 | |
| Schweinefleisch | 16 | |
| sonstige (Blumen, Ziegenmilch,…) | 21 | |
| Verarbeitete Produkte | Weine | 60 |
| Fleischprodukte | 42 | |
| Spirituosen | 24 | |
| Marmelade | 22 | |
| sonstige Erzeugnisse (Nudeln, Joghurt,…) | 39 |
Et ginn hei souwuel Betriber, déi nëmmen hier eege Saachen ubidden, wéi och der, di Produkter vun aner Produzentekollegen oder och Liewensmëttel vun Handelspartner weiderverkafen. A verschiddene Fäll hunn sech kleng Haffbutteker esou zu klengen Duerfepicerien entwéckelt.
- Wéi huet sech d’Unzuel u Betriber, déi an der Direktvermaartung aktiv sinn, an de leschte Joren entwéckelt?
Besonnesch zënter dem Ufank vun der COVID-19-Kris huet sech den direkte Verkaf vum Produzent un de Konsument weiderentwéckelt. Esou hu verschidde Betriber dës Vermaartungsméiglechkeeten nei ugefang, mee a ville Fäll hunn dës scho bestan a sinn awer elo ausgebaut ginn.
