Steierpolitik: D’Kafkraaft stäerken an d’Mëttelschicht entlaaschten
D’DP trëtt fir eng sozial gerecht an zäitgeméiss Steierpolitik an, déi de Realitéite vun eiser moderner Gesellschaft entsprécht. Déi steierlech Entlaaschtung vun der Mëttelschicht an d’Konkurrenzfäegkeet vun den Entreprisë bleiwen dobäi dat zentraalt Uleies vun der DP.
Mat der Steierreform vun 2017 huet déi DP-geféiert Regierung scho wichteg Schrëtt a Richtung vu méi Gerechtegkeet ënnerholl. D’Reform brauch substantiell Entlaaschtunge fir déi kleng a mëttel Betriber an eng geziilten Ënnerstëtzung fir elengerzéiend Leit.
De Support fir Stéit an Entreprisen ass an dëser Legislaturperiod mat deene ville Krise virugefouert ginn. D’Auswierkunge vun der Energiekris sinn duerch e gudde Sozialdialog an ëmfangräich Mesurëpäck ofgefiedert ginn. D’Moossnaame vun de Mesurëpäck hunn hir Friichte gedroen: Dem Statec no, hunn d’Stéit am Duerchschnëtt op d’mannst genee esou eng héich, wann net esouguer méi eng héich, Kafkraaft ewéi virun der Kris. Réckwierkend op den 1. Januar 2023 ass e Steierkredit an Héicht vun zwou Indextranche fir d’Joer 2023 ausbezuelt ginn. Vum nächste Joer u gëtt d’Steiertabell ëm 2,5 Indextranchen ugepasst, wat zu enger weiderer, spierbarer Baisse vun der Steierlaascht vun de Biergerinnen a Bierger féiere wäert.
D’DP wäert sech och an Zukunft fir steierlech Entlaaschtunge staark maachen: Dofir wäert d’DP an der nächster Legislaturperiod d’Steiertabelle reegelméisseg un d’Inflatioun upassen.
Doriwwer eraus setzt d’DP sech fir e moderne Steiersystem an, den d’Villfalt vun eiser Gesellschaft erëmspigelt. Eis mëttelfristegt Zil bleift, fir eng eenheetlech Steierklass anzeféieren, déi all d’Liewensmodeller gläichberechtegt behandelt. Domadder wëlle mir de strukturellen Ongerechtegkeete vun eisem Steiersystem en Enn setzen.
Am Aklang mam Prinzip vun engem faire Wettbewerb ënnerstëtzt d’DP d’Initiative vun der OECD a vun der Europäescher Unioun iwwer d’Fixatioun vun der Besteierung vu grousse Konzerner an och iwwer d’Aféierung vun engem Mindeststeiersaz. Et ass eis awer och wichteg, dass déi steierlech Mesurë weider attraktiv a konkurrenzfäeg bleiwen.
D’DP wäert eise Wirtschaftsstanduert duerch eng wettbewerbsfäeg Steierlandschaft stäerken, well si ass d’Viraussetzung fir gutt Aarbechtsplazen an zolidd Steierrecetten, déi eise Sozialsystem finanzéieren. Doriwwer eraus wäerte mir d’Entreprisen – zemol déi kleng a mëttel Betriber – entlaaschten a si bei der energeetescher an digitaler Transitioun verstäerkt ënnerstëtzen.
Privatpersounen
D’Besteierung vum Akommes ass e wichtege Faktor fir d’Attraktivitéit vum Land als Aarbechtsstanduert. D’Akommessteier muss dofir konkurrenzfäeg sinn. Am Kader vun der ugestriefter Individualiséierung wäert d’DP sech weider dofir asetzen, fir d’Stéit mat engem klengen oder mëttleren Akomme steierlech z’entlaaschten. Well Lëtzebuerg an direkter Konkurrenz zu aneren EU-Länner steet, muss awer och de Spëtzesteiersaz konkurrenzfäeg sinn. Fir eise staarke Sozialsystem ze finanzéieren, brauche mir eng dynamesch Wirtschaft an dofir muss eist Land e gudde Choix fir Salariéen aus dem In- an Ausland bleiwen. Dofir ass d’DP géint eng weider Erhéijung vum Spëtzesteiersaz a géint eng generell Hausse vun der Akommessteier.
D’DP wëll d’Mëttelschicht vun eiser Gesellschaft nohalteg entlaaschten. D’Regierung huet duerch déi vill finanziell Hëllefen an duerch d’Mesuren am Kader vun der Tripartite scho vill zum Erhalt vun der Kafkraaft bäigedroen. De réckwierkende Steierkredit an d’Deelupassung vun der Steiertabell ëm 2,5 Indextranchë fir dat nächst Joer wäerten d’Steierlaascht vun de Biergerinnen a Bierger zousätzlech erliichteren. Mir wëllen d’Steiertabell reegelméisseg un d’Inflatioun upassen, fir esou d’Mëtt vun der Gesellschaft virun den Auswierkunge vun der kaler Progressioun ze protegéieren.
D’DP setzt sech fir déi steierlech Gläichbehandlung vun alle Liewensmodeller an. Kee soll wéinst senger Liewenssituatioun (bestuet, gepacst, Wittmann, Wittfra, …) steierlech benodeelegt ginn. Mir setzen eis dofir fir d’Aféierung vun enger eenheetlecher Steierklass an. D’Ëmstellung op eng nei, eenheetlech Steiertabell soll schrëttweis gemaach ginn. Doriwwer eraus, wëlle mir wärend der Iwwergangsphas sécherstellen, datt zivilrechtlech Partnerschaften a bestuete Koppele bei der Lounsteier gläichberechtegt behandelt ginn. Dat bedeit, datt och Biergerinnen a Bierger an zivilrechtleche Partnerschaften direkt vu potentielle steierleche Vergënschtegunge bei der Akommessteier profitéieren, ouni op e Remboursement iwwert de Wee vun der Steiererklärung waarden ze mussen.
D’DP ass weider géint eng Verméigenssteier fir Privatpersounen. Esou eng Steier géing en iwwerméissegen Aarbechtsopwand mat sech bréngen an der Attraktivitéit vum Land schueden.
D’Ierfschaftssteier ass an de leschte Joerzéngten nëmme wéineg geännert ginn, wärend d’Lounsteiersätz no ënnen ugepasst gi sinn. Fir d’Ierfschaftssteier an indirekter Linn, wëlle mir d’Besteierungslimitt – entspriechend der Entwécklung vun der Inflatioun an de leschte Joren – no ënnen upassen. Mir si kloer géint d’Aféierung vun enger Ierfschaftssteier an direkter Linn.
Fir d’Verméigenssteier an indirekter Linn z’erliichteren, wäerte mir och d’Besteierung vu Schenkungen/Donatiounen zu Liewenszäit entspriechend erofsetzen. Dat erlaabt eng fair an ugemiesse Behandlung vum Verméigenstransfert tëschent Familljememberen.
Den aktuelle Steiersystem schreift en Héchstbetrag fir d’Ofschreiwungskategorië vir. D’DP wäert préiwen, wéi d’Ofschreiwungsméiglechkeete kënne méi flexibel gestallt ginn. Doduerch sollen d’Bierger an d’Biergerinnen hir Depensen an de verschiddene Liewensofschnëtter steierlech optimal geltend maache kënnen.
D’DP wëll analyséieren, a wéi wäit Sachleeschtunge vun de Betriber un hir Salariéë steierlech vereinfacht ginn, fir esou fir méi Kloerheet a méi Transparenz ze suergen.
Den Ament mussen d’Salariéë fir all Aarbechtsstonne Bäiträg un d’Gesondheetskeess an un d’Fleegeversécherung bezuelen. D’DP wëll déi Bäiträg fir d’Iwwerstonnen ofschafen, fir datt d’Leit méi Netto vum Brutto behalen. Doriwwer eraus wëll d’DP d’Steier-Exoneratioun fir Iwwerstonnen – wéi se an der Privatwirtschaft fonctionéiert – och am ëffentlechen Déngscht aféieren.
D’DP setzt sech weider fir eng flexibel Aarbechtswelt an, déi de Besoine vun de Salariéë gerecht gëtt. Dozou gehéiert d’Méiglechkeet, fir den Teletravail ze notzen, wat de Mënsche méi Flexibilitéit an der Organisatioun vum hirem Alldag bréngt. An der nächster Legislaturperiod wäerte mir d’Fräibeträg an d’Deductibilitéit bei der Akommessteier iwwerpréiwen an d’Steiergesetzer deemno wéi upassen, fir den Ufuerderungen a Realitéite vun der moderner Aarbechtswelt gerecht ze ginn.
D’DP-Finanzministeren hu sech scho mat Succès fir d’Unerkennung vu bis 34 Deeg Teletravail fir d’Grenzgänger aus Frankräich an aus der Belsch agesat. Mir wäerte weider u bilateralen Ofkomme schaffen, fir den Teletravail fir d’Grenzgänger auszebauen. Déi Mesurë wäerten eiser Wirtschaft och an anere Beräicher zeguttkommen. Besonnesch Startuppe kënnen Talenter esou méi einfach unzéien a se laangfristeg u sech bannen.
Startuppe spillen eng wichteg Roll, fir eis Wirtschaft ze diversifiéieren an d’Innovatioun an de Fortschrëtt ze fërderen. Déi jonk Entreprisen hunn awer dacks Problemer, fir déi néideg Mëttel zesummenzekréien, fir hir Iddien ëmzesetzen a fir sech weider z’entwéckelen. D’DP wëll zousätzlech steierlech Ureizer fir Privatleit schafen, fir a jonk an innovativ Betriber (dorënner Handel an Handwierk) z’investéieren.
D’DP wëll préiwen, ob et méiglech ass, fir eng steierfräi Loyersprimm anzeféieren. Esou kéinten d’Betriber jonk Salariéen zousätzlech fir hir Performancë belounen. Déi Primm géing sech geziilt u jonk Locatairen am Alter vun 18 bis 35 Joer riichten.
D’DP-geféiert Regierung huet schonn eng Abberzuel u steierlechen Ureizer am Beräich Klima- an Ëmweltschutz ëmgesat. Dozou zielt ë.a. de super-reduzéierten TVA-Taux vun 3 Prozent op der Sanéierung vu Wunnhaiser a Gebaier vu méi ewéi 10 Joer, an op dem Kaf vu Fotovoltaik-Anlagen. D’DP wäert konsequent op deem Wee weiderfueren, a sech fir e super-reduzéierten TVA-Taux vun dräi Prozent op elektresche Fortbeweegungsmëttel am Beräich vun der doucer Mobilitéit (Vëloen, Trottinetten) op EU-Niveau asetzen. Esou sollen ëmweltfrëndlech Alternativen zousätzlech gefërdert ginn.
D’DP stellt sécher, datt déi gesetzlech Renteversécherung déi zentral Sail vum Rentesystem bleift. D’DP setzt sech och fir eng viilfälteg a flexibel Altersvirsuerg an, déi de Bedürfnisser vun de Versécherte gerecht gëtt an déi nohalteg Investitioune fërdert. An deem Kontext wäerte mir de Versécherten d’Méiglechkeet ginn, fir hir privat Altersvirsuerg kënne steierlech ofzesetzen (3. Sail).
Fir déi zweet Sail vun der Renteversécherung wäerte mir d’Héicht vum decuctibele Betrag un e gewësse Prozentsaz vum Loun koppelen a méi eng héich Deductibilitéit virgesinn, wann déi Beiträg an nohalteg Projete fléissen.
D’DP wëll generell de Kontakt tëschent de Biergerinnen a Bierger an de Verwaltunge verbesseren. Dofir sollen Guicheten uechter d’Land installéiert ginn – dorënner och fir Steierfroen. Doriwwer eraus wëll d’DP den digitale Kontakt mat de Steierverwaltungen ausbauen an administrativ Prozedure vereinfachen. En zentralen Dashboard am Beräich vu MyGuichet soll de Leit en Iwwerbléck iwwert hir Steiersituatioun ginn, an och d’Méiglechkeet bidden, fir verschidden administrativ Demarchen onkomplizéiert duerchzeféieren – z.B. d’Fixatioun vu Steieravancen. D’DP wëll och sécherstellen, datt d’Matdeelunge vun de Steierverwaltungen esou kloer wéi méiglech gehale sinn, fir d’Kommunikatioun mat de Biergerinnen a Bierger z’erliichteren.
D’lescht Joer huet déi vun der DP gefouert Regierung éischt Schréck ënnerholl, fir d’Gewënnbedeelegung (Bonus/Prime participative) vun de Salariéë weider ze fërderen. D’DP wäert weider Mesuren ergräifen, fir déi Gewënnbedeelegung fir déi Beschäftegt a fir d’Betriber nach méi attraktiv ze gestalten.
Nieft der Prime participative ass deen an der leschter Legislaturperiod ugepasste Régime d’impatrié e wichtegt Element, fir Talenter unzezéien. D’DP wäert d’Effikassitéit vun deem Instrument op de Leescht huelen an eventuell weider upassen.
D’DP wäert d’Participatioun vun de Salariéeën um Kapital vun hirer Entreprise steierlech ënnerstëtzen an déi Beschäftegt doduerjer méi staark um Succès vun hirem Betrib bedeelegen. Mir wëllen en neie Stock options-Regime aféieren – besonnesch mat Bléck op d’Startuppen.
Cf. Kapitel Nohaltegkeet
D’DP erkennt déi grouss Bedeitung vu Sport, Kultur an Éierenamt fir eis Gesellschaft un, a plangt dofir, de steierlech ofsetzbare Betrag fir Ausgaben, vun elo 5.000 op 7.500 Euro eropzesetzen. Domadder wëlle mir d’Engagement an de Sportsveräiner, an der Kultur an am Fräiwëllegendéngscht weider ënnerstëtzen an déi finanziell Belaaschtung fir déi concernéiert Leit erofsetzen.
An dëser Legislaturperiod ass d’Frist fir d’Steiererklärung ofzeginn, schonn ëm néng Méint verlängert ginn. D’DP wëll sech elo dofir asetzen, datt d’Steierverwaltung d’Declaratioune bannent héchstens dräi Méint verschafft. Dofir kréien d’Steierverwaltunge méi Leit. Weider soll déi digital Steiererklärung verbessert ginn, besonnesch – nom once only-Prinzip – duerch déi automatesch Reprise vu scho bekannten Daten. Weider sollen Informatiounen aus anere staatleche Regësteren automatesch an d’Steiererklärung afléissen, esoulaang den Dateschutz dat erlaabt.
Cf. Kapitel Finanzplaz
Immobiliebesteierung
D’DP ass sech der urgenter Problematik um Wunnengsmaart bewosst a plangt weider steierlech Mesuren an der nächster Legislaturperiod, fir de Marché ze relancéieren, de Kaf vu Wunnengen z’erliichteren an déi finanziell Belaaschtung vun de Biergerinnen a Bierger ze reduzéieren.
An deem Kontext huet d’DP-geféiert Regierung déi lescht Méint de Steierkredit vum Bëllegen Akt scho vun 20.000 op 30.000 Euro eropgesat. Zousätzlech ass den Abattement vun de Scholdzënsen, fir d’Finanzéierung vun selwer bewunntem Wunnraum vun 2.000 op 3.000 Euro (pro Member vum Stot) ugepasst ginn.
Cf. Kapitel Wunnengsbau
D’DP wëll et de jonke Mënsche méi einfach maachen, fir Wunnraum ze kafen. Dofir wëlle mir deene Jonken, déi eng éischt Wunneng fir sech selwer kafen, eng eemoleg Exoneratioun vun den Droits d’enregistrement accordéieren, esou änlech ewéi an Holland.
Cf. Kapitel Wunnengsbau
Cf. Kapitel Wunnengsbau
Entreprisen
D’DP wëll d’Kierperschafts- an d’Gewerbesteier un d’Moyenne an den EU- an OECD-Länner upassen. Duerch d’Baisse vun de Steiersätz gëtt d’Attraktivitéit vum Standuert Lëtzebuerg gestäerkt. D’DP ass dovunner iwwerzeegt, datt déi Moossnaamen eist Wirtschaftsëmfeld fërderen. Doriwwer eraus wëlle mir och déi kleng a mëttel Betriber ënnerstëtzen.
D’DP wëll Entreprisë bei hiren Investitiounen an déi digital an déi ökologesch Transitioun, souwéi an d’Fuerschung an an d’Entwécklung, méi staark ënnerstëtzen. Dofir wäerte mir de Pak un Ureizer (a Form vu Steierkreditter oder steierleche Super-Abattementen) weider ausbauen. Dat soll dozou bäidroen, datt d’Betriber mat hiren Innovatioune virukommen an den Iwwergang zu enger nohalteger an digitaler Wirtschaft fërderen.
Cf. Kapital Privatpersounen
D’Verméigenssteier fir Entreprisen ass eng Singularitéit vun der Lëtzebuerger Steiergesetzgebung, déi zu Nodeeler bei der Konkurrenzfäegkeet géintiwwer dem Ausland féiert. D’DP wëll dofir déi Verméigenssteier erofsetzen an hir Applikatioun aschränken, fir de Standuert ze stäerken.
Fir nohalteg Investitioune weider ze fërderen, huet d’DP-geféiert Regierung an der leschter Legislaturperiod d’Taxe d’abonnement fir Investmentfongen erofgesat, déi konform zu den usprochsvolle Critèrë vun der europäescher Taxonomie sinn. D’DP wëll den Effet vun der reduzéierter Taxe d’abonnement ënnersichen, a kucken, a wéiwäit aner Ureizer néideg sinn, fir Investitiounen an ëmwelt- a klimafrëndlech Aktivitéite weider z’encouragéieren.
Fir d’Rechtssécherheet vun den Entreprisen ze stäerken, setzt d’DP sech fir méi einfach Verwaltungsprozeduren a fir eng méi modern Steiergesetzgebung an. An engems solle méi Personal an Digitalisatioun fir eng méi séier Kommunikatioun tëschent de Steierzueler an de Steierverwaltunge suergen.
D’DP ass sech den Erausfuerderunge vum 21. Jorhonnert bewosst an ass dovunner iwwerzeegt, datt d’Besteierung an enger globaliséierter Welt muss zesummen abordéiert ginn. Dofir hu mir d’Entwécklunge vum europäeschen an internationale Steierrecht vun Ufank un aktiv begleet a mir wäerten dat och an Zukunft maachen. Gläichzäiteg bleiwe mir kritesch vis-à-vis vun neie Reguléierungen, déi hiert Zil net erreechen oder doriwwer erausschéissen.
D’DP ass sech der Bedeitung vun den Duebelbesteierungsofkommes als Instrument vun der Stäerkung vun de Wirtschaftsrelatioune vum Land a vun der Finanzplaz bewosst. Dofir setze mir eis aktiv dofir an, déi Accorde weider auszebauen.
