Landesplanung: Eist Land nohalteg plangen
Vill vun de Problemer, mat deenen eist Land haut konfrontéiert ass, sinn op eng falsch Landesplanung zeréckzeféieren. Déi respektabel wirtschaftlech Entwécklung an de leschte Joerzéngten huet wuel zu enger grousser Richesse an zu engem staarke Sozialstaat geféiert. Ma duerch eng feelend Begleedung a Steierung vun der Croissance, huet sech an engems e groussen Nohuelbedarf a ville Beräich ugestaut, sief et bei den ëffentlechen Infrastukturen, der Mobilitéit oder beim Schafe vu Wunnraum.
Eréischt d’DP-geféiert Regierung huet de Stau vun der Landesplanung deblockéiert an ugefangen, de Retard duerch massiv Investitiounen – z.B. an den ëffentlechen Transport – opzehuelen. Duerch eng kohärent an nohalteg Landesplanung wäert d’DP de Besoin un neien Infrastrukture geziilt guidéieren an esou de kommenden Entwécklunge virgräifen.
D’DP wëll Aarbecht, Fräizäit a Wunne besser matenaner verbannen, déi deeglech Trajete reduzéieren an d’Gemengen am ländleche Raum nei beliewen, fir de Mënschen eng besser Liewensqualitéit ze bidden. Amplaz e groussen Deel vun der Attraktivitéit op den Zentrum vum Land ze konzentréieren, wëlle mir d’Dezentraliséierung ausbauen an déi regional Entwécklungszentren (CDA) verstäerken.
Mir mussen eist Land dobäi am Aklang mat engem nohaltegen Ressourceverbrauch an Ëmweltschutz weiderentwéckeln. D’DP wëll mat enger kohärenter Landesplanung géint d’Landschaftszersiedlung virgoen an d’Buedemversiggelung ofbauen. Mir wëllen och déi néideg Weiche stellen, fir e qualitatiivt Wuesstem ze garantéieren, dat net eleng op engem lineäre Verbrauch vun de Ressourcen a op méi Aarbechtsplaze baséiert.
D’DP-geféiert Regierung huet an der vergaangener Legislaturperiod dofir gesuergt, datt déi véier sektoriell Pläng konnten a Kraaft trieden, an no 20 Joer endlech en neie Programme directeur de l’aménagement du territoire (PDAT) virgeluecht. D’DP wäert eng nohalteg a kohärent Entwécklung vum Land duerch d’Ëmsetzung vun de sektorielle Pläng a vum PDAT sécherstellen.
D’DP wëll de Gemengen déi néideg finanziell Mëttel zur Verfügung stellen, fir datt si de Biergerinnen a Bierger kënnen héichwäerteg Servicer an Infrastukture bidden, déi de Besoine vun der Populatioun an de Ziler vun der Landesplanung gerecht ginn. D’DP ass dovunner iwwerzeegt, datt de Staat de Gemenge muss zousätzlech finanziell Mëttel ginn, fir déi wuessend Verflichtunge géintiwwer de Bierger z’erfëllen. Dofir wäerte mir de Gemengen an de Ballungszentren an de Gemengen iwwer Land e gréissere finanzielle Spillraum accordéieren.
D’DP schwätzt sech fir eng wirtschaftlech Dezentraliséierung no landesplanerësche Critèren aus. Fir d’Aarbechtsplazen erëm méi bei d’Leit ze bréngen an net ëmgedréint, wäert d’DP d’Aktivitéitszone laanscht d’Grenzen ausbauen. Weider regional Antenne vum House of Entrepreneurship sollen iwwerdeems dofir suergen, datt sech méi Entreprisen an de Regiounen installéieren.
Doriwwer eraus soll de Bau vu weidere Co-Working-Spaces laanscht d’Grenze gefërdert ginn.
Cf. Kapitel Wirtschaftspolitik
Cf. Kapitel Gemengen
