„Wann ech et nach eemol misst maachen, da géif ech mat der Kultur ufänken!“ Dës Wierder gi gären a Verbindung bruecht mam Jean Monnet, engem franséische Politiker an engem vun den éischte Virdenker vun der Europäescher Unioun!
Kultur als wichtegt Element fir ee vereent a staarkt Europa!
An dat ass genee dat, wat mir ELO brauchen!
Kommt mir fänken ELO u mat der Kultur a ginn hir dee Stellewäert, dee si verdéngt, wa mir an engem staarken Europa wëlle liewen an d’Politik vu muer wëllen definéieren. D‘Kultur muss als Substanz vun der Politik gesi ginn, als Basis fir kënnen op déi sëllegen Defisen, deenen Europa den Ament ausgesat ass, ze reagéieren.
D’europäesch Kulturpolitik huet sech laang am Hannergrond gehalen. Si muss awer endlech ufänken, hir Responsabilitéiten ze huelen, wann et drëms geet.
Si muss Brécke schloen tëschent de Biergerinnen a Bierger an enger multikultureller Gesellschaft. Si muss dofir:
- den interkulturellen Dialog pfleegen an déi sozial Inclusioun ffërderen;
- eis gemeinsam Wärter schützen an ons d’Fräiheete liewe loossen, fir déi ons viregt Generatiounen sech agesat hunn.
D’Europäesch Kulturpolitik muss gesellschaftlech Themen an de Fokus stellen, andeem se all kreativ Ausdrocksformen net nëmmen ënnerstëtzt mee och schützt, an dëser digitaliséierter Welt, déi net méi opzehalen ass. Eng Entwécklung, déi mir net dierfe fäerten, mee intelligent notzenmussen. An zwar zum Wuel vun onser Gesellschaft, fir esou deen néidegen Impakt ze schafen a jidderee matzehuelen, egal wou e grad steet.
Héichkultur, Alldagskultur, ons Traditiounen, ons Aart&Weis; all dat ass Kultur… en Element dat Generatiounen, Communautéiten a Milieue matenaner verbënnt.
Fir d’DP ass déi kulturell Identitéit, déi scho bannent den Natioune selwer, a besonnesch op europäeschem Niveau, ganz villfälteg ass, e Faktor vun der Distinctioun a vun der Inklusioun. Mir wëllen d’EU an hirer Roll als Vermëttler am Beräich vum kulturellen Echange an als Verdeedegerin vun der Eegenaart vun der europäescher Kultur ënnerstëtzen.
D’EU muss d’Memberstaate weider dobäi stäipen, fir déi sëllegen Erausfuerderunge vun de kommende Joren ze meeschteren, dorënner eben och d’Stäerkung vun der Kultur fir den interkulturellen Dialog a fir déi sozial Integratioun. Dofir muss d’EU och bereet sinn, hire Bäitrag ze leeschten.
Méi wéi jee si kritescht Denken an en oppenen Entrepreneursgeescht néideg. Deemno muss sech och ëm déi kulturell Bildung bekëmmert ginn, een zentraalt Element fir eng multikulturell Gesellschaft, déi hir Zukunft soll an de Grapp huelen.
Kultur steet net fir Kippercher, Schnittercher a Bännercher duerchschneiden, ma Kultur ass een transversale Sujet, dee vill Facette vun eiser Gesellschaft betrëfft. Mer mussen d’Kultur méi wéi jee eescht huelen, wa mer wëlle gemeinsam um Projet Europa schaffen. De Constat ass deen, datt den Ament net alles riicht leeft an dësem Projet. Ma et ass nach Zäit, fir ELO nei unzefänken, et ass genee ELO, wou mir solle mat der Kultur ufänken.
