Frage
„D’Resultater vum leschten Inventaire phytosanitaire 2023 vun der Natur- a Bëschverwaltung hu gewisen, dass 14,5% vun de Beem komplett gesond sinn. 2013 waren et nach 33,8%. An 2023 gouf och fonnt, dass 12,3% vun de Beem scho souzesoen dout (déperissement avancé) oder wierklech dout sinn, wat immens beonrouegend ass. De Gesondheetszoustand vun de Beem zu Lëtzebuerg huet sech staark verschlechtert. Extrem Wiederkonditioune kënnen dozou féieren, dass d‘Entlaubung vun de Beem méi fréi an der Saison geschitt. Zum Beispill haten déi anormal waarm an dréche Fréijoren a Summeren tëscht 2018 an 2020, 2022 an 2023 en Impakt op d’Gesondheet vun de Beem.
Lëtzebuerg huet den 12. Juli 2023 en neit Bëschgesetz adoptéiert fir d’Bëscher nach besser ze schützen a gläichzäiteg eng sanft Exploitatioun z’erméiglechen.
An deem Kader wollte mir dem Här Minister fir Ëmwelt, Klima a Biodiversitéit follgend Froe stellen:
– Wéi eng konkret Projete lafe fir dem verschlechternde Gesondheetszoustand an der verschlechternder Resilienz vun de Bëscher entgéintzewierken? A wéi enge Regiounen oder Gemenge lafen déi Projeten?
– Wat gesäit de Minister vir fir massiv nei unzeplanzen an de Verloscht u Beem ze kompenséieren? Wat fir Aarte vu Beem kann een dobäi virgesi, déi méi klimaresistent sinn? Wéi eng konkret Mesurë ginn ëmgesat vir eis Bëscher generell méi klimaresilient ze maachen?
-Verschidden Organismen, wéi de Borkenkäfer, kënne massiv Defoliatiounen vun de Beem erbäibréngen. Ass z’erwaarden, dass duerch den naassen Hierscht a Wanter de Borkenkäfer manner Schued uriichte kann?“
