De Méinden, 10 Mäerz huet d’Ettelbrécker DP-Sektioun parallel mat véier aner Sektiounen aus dem Nordbezierk hir Generalversammlung am Centre culturel zu Bungeref ofgehalen.
No kuerzen aleedene Wieder vum Här Mike Poiré, President vum DP-Norden, hunn déi eenzel Sektiounen hir jeeweileg Assemblée Générale ofgehalen.
Fir eis Ettelbrécker Sektioun hunn d’Madamm Anne Daems, Presidentin, d’Hären David Fernandes a Léon Schmit, Sekretär, bzw. Tresorier e kuerze Bilan iwwer d’Aarbechte vun der Sektioun am vergaangene Joer gemaach. Duerno huet den Här Jemp Gutenkauf e kuerzen awer detailléierte Bilan iwwer d’Aarbecht, déi hien zesumme mam Här Alain Feypel, am Ettelbrécker Gemengerot geleescht huet. Duerno kruuten d’Nolauschterer nach een Iwwerbléck iwwer déi vill nei Projeten, déi zäitno envisagéiert ginn, ugepak ze ginn.
Nodeems all d‘Sektiounen hir AG ofgeschloss hat, hunn eis Mandatairen, d‘Hären Michel Goethals (President vun der JDL-Norden), André Bauler (Deputéiert) , Eric Thill (Minister), Mike Poiré (President vun der DP-Norden) an d’Madamm Carole Hartmann (Deputéiert a Generalsekretärin vun der DP) ee kuerzen Abléck an ënnerschiddlech regional, national an international Theme ginn, déi an hirem Kompetenzberäich leien, bzw. déi hinnen um Häerze leien. Zum Schluss gouf den Uwiesenden e Patt an eng Klengegkeet z’iessen offréiert.
Fir de perfekten organisatoresche Kader vun dësen “Assemblées générales conjointes” hunn souwuel d’DP-Sektioun Rammerech ënner dem Lead vum Här Romain Rausch, President, wéi och den DP-Nordbezierk, mam Här Mike Poiré un der Spëtzt, gesuergt. Hinnen dofir all e grousse MERCI.
