Sie sind hier

Parlamentarische Fragen Gesundheit und Pflege Max Hahn Carole Hartmann

D'Virdeeler vun der 5G-Technologie fir d'Telemedizin

Den Ausbau vun der 5G-Technologie kéint ee grousst Potential fir d'Telemedizin zu Lëtzebuerg hunn. D'DP-Deputéiert, Max Hahn a Carole Hartmann, hu bei den zoustännege Ministeschen nogefrot, wéi hir Meenung zu dësem Sujet ass.

Parlamentarische Fragen Gesundheit und Pflege Tourismus Claude Lamberty Max Hahn

Duebel Gefor op de Lëtzebuerger Séien a Weieren iwwert de Summer

D’’Vakanz doheem’ dreift dëse Summer vill Leit bei déi heemesch Séien a Weiere fir do an der Sonn a beim Waasser e puer flott Momenter ze verbréngen. An obwuel sécherlech d’Verbreede vum Corona Virus an déi néideg Distanzreegelungen dëst Joer en Haaptthema sinn, gëllt et net ze vergiessen, dass och d’Waasser ka geféierlech sinn, an dass reegelméisseg Accidenter passéieren. An dësem Kontext, hunn sech d'DP-Deputéiert, Max Hahn a Claude Lamberty, bei der Inneministesch an dem Minister fir bannenzeg Sécherheet informéiert, wéi d’Gäscht op de Lëtzebuerger Plagen och dëse Summer kënnen an aller Sécherheet profitéieren.

Parlamentarische Fragen Mobilität und Verkehr Max Hahn Carole Hartmann

Wéi gesäit et mat der Reform vum Adapto aus?

Quitt dass et roueg ëm d'Reform vum Adapto ginn ass, ass den DP-Deputéierte Max Hahn a Carole Hartmann zu Ouere komm, dass um Terrain villes nach net klappt. Aus deem Grond hu si beim zoustännege Minister nogefrot, wéi et bei der Ëmsetzung vun der Adapto-Reform ausgesäit a wou eventuell nach nogebessert muss ginn.

Parlamentarische Fragen Mobilität und Verkehr Claude Lamberty Max Hahn

5G a WiFi am ëffentlechen Transport

A wéi ville Bussen an Zich gëtt et scho WiFi fir d'Passagéier? Bis wéini ginn d'Zich vun der CFL domadder equipéiert? Wäert d'CFL vum Opbau vum nationale 5G Reseau profitéieren, fir de Passagéier an Zukunft eng méi grouss Bandbreet zur Verfügung ze stellen? D'DP-Deputéiert Claude Lamberty a Max Hahn hunn dem Mobilitéitsminister e puer Froen zu deem Sujet gestallt.

Parlamentarische Fragen Mobilität und Verkehr Max Hahn

Manner Zuchkaméidi duerch Dämpfer op de Schinnen?

De Kaméidi vun Zich stellt dacks eng grouss Belaaschtung duer fir d'Leit, déi an der Géigend vun enger Gare oder Schinne wunnen. An hirer Äntwert op dem DP-Deputéierte Max Hahn seng parlamentaresch Fro hat d'Ëmweltministesch e Pilot Projet ernimmt, bei deem sougenannten "raildampers" op de Schinnen installéiert ginn, fir de Kaméidi ze reduzéieren. De Max Hahn huet dowéinst beim Mobilitéitsminister nogefrot, wat d'Konklusioune vun dësem Projet wieren an ob sou Dämpfer op méi Plazen am Land wäerten installéiert ginn.

Parlamentarische Fragen Nachhaltigkeit, Natur- und Umweltschutz Max Hahn Gusty Graas

Verbuet vun der "obsolescence programmée" och zu Lëtzebuerg?

A Frankräich gouf Apple am Februar vun dësem Joer verklot, well se al iPhone-Modeller méi lues gemaach hunn, nodeems en neie Modell op de Marché komm ass. Sou eng bewosst Verkierzung vun der Liewensdauer vun engem Produit, fir d'Clienten dozou ze beweegen, en neie Produit ze kafen, ass net just Bedruch um Client, mee och en immens ineffikassen a verschwendereschen Ëmgang mat eise Ressourcen. D'DP-Deputéiert Max Hahn a Gusty Graas hu bei den zwou concernéierte Ministeschen nogefrot, ob d'Regierung net wëlles hätt, e Gesetz nom franséische Virbild anzeféieren.

Parlamentarische Fragen Mobilität und Verkehr Max Hahn

Bei Stau duerch d'Mëtt iwwerhuelen?

A ville Länner ass et schonn erlaabt an international Etüde weisen, dass et fir Motorradsfuerer och méi sécher ass, bei Stau duerch d'Mëtt z'iwwerhuelen. Den DP-Deputéierte Max Hahn huet beim zoustännege Minister nogefrot, ob et eng Méiglechkeet wier, dës Praxis och hei am Land ze legaliséieren.

Parlamentarische Fragen Landesplanung und Wohnen Nachhaltigkeit, Natur- und Umweltschutz Max Hahn Gusty Graas

Drécheperioden: Privat Reewaasserbasengen fir Drénkwaasser ze spueren?

Duerch déi laang Drécheperiode geroden d'Waasserressourcen zu Lëtzebuerg ëmmer méi ënner Drock, soudass den Ëmweltministère d'Bierger ëmmer nees opfuerdert, spuersam mam Waasser ëmzegoen. D'DP-Deputéiert Max Hahn a Gusty Graas hu bei der zoustänneger Ministesch nogefrot, ob et net eng Iddi wier, Reewaasserbasenge bei privaten Haiser ze fërderen, fir sou manner Drénkwaasser ze verbrauchen fir verschidden Aktivitéiten, wéi z.B. Planzen nätzen asw.

Parlamentarische Fragen Landesplanung und Wohnen Max Hahn

Alternativ Wunnformen méi einfach zougänglech maachen

Ëmmer méi Leit entscheede sech gäre fir alternativ Wunnformen, wéi z.B. "tiny houses". Zu Lëtzebuerg ginn et allerdéngs den Ament nach eng Rei Schwieregkeeten, wann een dee Wee goe wëll, z.B. a Bezuch op d'Mindestufuerderunge par rapport zur Gréisst vun enger Wunnunitéit. Den DP-Deputéierte Max Hahn huet nogefrot, wéi d'Regierung et den intresséierte Leit méi einfach wëll maachen, an engem "tiny house" ze wunnen a wéi gläichzäiteg verhënnert soll ginn, dass et op deem Wee zu enger Verbreedung vu prekäre Wunnverhältnisser kënnt.

Parlamentarische Fragen Mobilität und Verkehr Frank Colabianchi Max Hahn

Wéini gëtt d'Vëlospist PC35 fäerdeg gestallt?

Wéi et schéngt, géif nach just e klengen Deel feelen, da kéint d'Vëlospist PC35 fäerdeg gestallt ginn. Domadder géif et eng duerchgehend Vëlosverbindung aus dem Raum Suessem a Käerjeng, iwwer d'Gemengen Dippech a Bartreng bis op Mamer an an d'Stad ginn. D'DP-Deputéiert Max Hahn a Frank Colabianchi hu beim zoustännege Minister nogefrot, fir wéini dës Aarbechten ofgeschloss kéinte ginn.

Parlamentarische Fragen Landwirtschaft und Weinbau Nachhaltigkeit, Natur- und Umweltschutz Max Hahn Gusty Graas

Mat Drone Réikitz retten?

D'Gebuert vun de Réikitz am Fréijoer fält dack mam éischte Méie vun de Felder zesummen. Well awer deene jonken Déieren hire Fluchtreflex nach net entwéckelt ass, lafen se net fort, wann de Mähdrescher kënnt a geroden ëmmer nees ënnert d'Messeren. Dëst féiert zu ganz uerge Blessuren, un deenen d'Déieren an der Reegel net direkt stierwen, mee lues verbludden. Hautdesdaags ass et awer méiglech, mat Drone mat Wärmebildkameraen e Feld séier ofzesichen, quitt dass déi héich Käschten ee verständlecherweis kënnen dovunner ofhalen, dee Service an Usproch ze huelen. D'DP-Deputéiert Max Hahn a Gusty Graas hunn nogefrot, ob d'Regierung bereet wier, de Bauere finanziell bäizestoen, wann dës op sou e Service zréckgräife géifen.

Parlamentarische Fragen Gesundheit und Pflege Mobilität und Verkehr Max Hahn Gusty Graas

Fluchverbindung Findel-Stockholm: Wat sinn d'Risike fir nei Corona-Infektiounen?

Well viru kuerzem a Schweden den Taux vun den Neiinfektiounen op iwwer 50 pro 100 000 Awunner geklommen ass, wat bei wäitem dat héchst a ganz Europa ass, huet déi däitsch Regierung de Bundeslänner d'Recommandatioun ginn, Leit déi aus Schweden an Däitschland reesen, fir zwou Wochen an d'Quarantaine ze schécken. Vu dass d'Luxair, déi zënter dem 29. Mee rëm flitt, och Stockholm vum Findel aus uflitt, hunn d'DP-Deputéiert Gusty Graas a Max Hahn eng Drénglechkeetsfro un déi zoustänneg Ministere geriicht fir nozefroen, wéi se wëlles hunn mat där Situatioun ëmzegoen.

Parlamentarische Fragen Nachhaltigkeit, Natur- und Umweltschutz Wirtschaft André Bauler Max Hahn

Wéi steet et ëm d'Holzwirtschaft zu Lëtzebuerg?

Déi laang Drécheperioden an de Borkenkäfer belaaschten eis Bëscher staark, virun allem d'Fichtebestänn si betraff. Dëst huet zur Konsequenz, dass de Marché mat Schuedholz iwwerschwemmt ginn ass a vill Bëschbesëtzer op hirem Holz sëtzebleiwen. D'DP-Deputéiert Max Hahn an André Bauler hunn nogefrot, wéi et dem Secteur geet a wéi eng zousätzlech Mesuren eventuell geholl kéinte gi fir de betraffene Leit a Betriber ze hëllefen.

Parlamentarische Fragen Mobilität und Verkehr Max Hahn Gusty Graas

Digitaliséierung vun de Servicer vun der SNCA

D'Digitaliséierung vun de Verwaltungen an hire Servicer brénge vill Virdeeler fir d'Bierger, d'Corona-Kris huet dëst op en Neits ënnerstrach. D'DP-Deputéiert Gusty Graas a Max Hahn hu beim zoustännege Minister nogefrot wéi et ëm d'Digitaliséierung bei der SNCA steet.

Parlamentarische Fragen Mobilität und Verkehr Max Hahn Gusty Graas

Kriteschen Zoustand vun der N33

Et ass den DP-Deputéierte Gusty Graas a Max Hahn zu Ouere komm, dass d'N33 op der Héicht vum Käler Potto an engem kriteschen Zoustand wier, an dass och net ausgeschloss kéint ginn, dass de Buedem op där Plaz eng Kéier rutscht. Ugesiichts vun de seriöe Konsequenzen, déi sou en Äerdrutsch fir d'Mobilitéit am ganze Käldall mat sech brénge géif, hunn de Gusty Graas an de Max Hahn beim zoustännege Minister nogefrot, ob de Minister sech däers bewosst ass an, wa jo, wat geplangt wier, fir dës Strooss ze stabiliséieren.