An engem Futurelab iwwer Klima, Ëmwelt a Mobilitéit hunn eng ettlech DP-Membere ganz pragmatesch doriwwer diskutéiert, wéi ee gutt Iddien ëmsetzt a wéi ee wichteg Froen an deene Beräicher um Terrain behandelt. Och bei dësem Thema wäerten d’Äntwerten an d’Propose vun de Memberen hir Repercussiounen am Kaderprogramm vun der DP fir d’Gemengewalen hunn.

Zanter dem 24. Februar ass nees Krich an Europa an d’Energie ass zu enger Waff an deem Krich ginn: Et gëtt manner Energie a se gëtt méi deier. An engem FutureLab fir Gemengemandataire si Beispiller a Modeller entwéckelt ginn, wéi een op kommunalem Niveau mat dëser Realitéit ëmgeet.

Wat mécht eng gutt Gemengepolitik aus? Dat si virop emol eng gutt iwwerluechte Finanzpolitik an Transparenz an alle Beräicher an och eng zäitgeméiss Digitaliséierung. Méi ewéi 50 Leit si sech um Enn vum FutureLab zu Nidderaanwen iwwer ganz konkret Virschléi fir d’Gemengepolitik eens ginn.

An engem anere FutureLab hunn d’Stater Députée-Maire Lydie Polfer an den Deputéierten a Beetebuerger Schäffe Gusty Graas – Auteur vun engem Buch iwwert d’Lëtzebuerger Kommunalverfassung – an enger Masterclass d’Komplexitéit an déi domadder verbonnen Erausfuerderunge bei der Gerance vun enger Gemeng virgestallt.

Deplianten a Flyere wäerten och an Zukunft hir Roll an der kommunaler Kommunalpolitik spillen. Ma d’Roll vun de soziale Medien an der Kommunikatioun ass antëscht extrem wichteg ginn. An engem weidere FutureLab ass doriwwer diskutéiert ginn, wéi een déi sozial Medien och an de kommende Walcampagne gebrauche kann.

Am éischte FutureLab vun der DP hunn eng ettlech vu eise Memberen – déi op verschiddene Niveaue politesch aktiv sinn – iwwert de Logement diskutéiert. Wéi een déi extrem Hausse vun de Wunnengspräisser kéint an de Grëff kréien, a wéi eng nei Pisten een am Wunnengsbau aschloë sollt.